Notisia di polis di djárason 22 di yanüari te ku djabièrnè 24 di yanüari 2025
Kralendijk - Detenshon pa manehá bou di influensia - Djabièrnè 24 di yanüari, alrededor di 2.45 or di mardugá, a detené un hòmber di inisial E.J.Y.M. di 30 aña di edat riba Kaya Korona pa manehá bou di influensia di alkohòl. E detenshon a tuma lugá despues ku un patruya ku tabata kore riba e kaya menshoná, a mira un vehíkulo ku a dal frontal den un palu di lus. Na momentu ku e agentenan a baha for di outo pa wak si e shofùr mester di asistensia, el a indiká ku e no mester di ayudo. Despues di investigashon mas aleu a resultá ku e shofùr no tabatin un reibeweis bálido i e vehíkulo no tabata sigurá. Konforme e maneho di ‘botsen is blazen’, a hasi un tèst di supla ku e shofùr. A resultá ku el a konsumí mas alkohòl ku ta permití. A detené e sospechoso i a hib’é warda di polis pa un análisis di rosea. E palu di lus no a haña daño a konsekuensia di e aksidente.
Kiebro den kas
Djaweps 23 di yanüari a drenta keho tokante kiebro den un apartamentu situá na Kaya Sirena. Entre 7 or di mainta i 3.30 or di atardi riba e fecha menshoná, deskonosínan a haña akseso dor ku e porta di dilanti no tabata na lòk i a listra den e apartamentu. A bai ku un telefòn pretu di marka Xiaomi modèl 11T for di den kamber. Ta investigando e kaso.
Detenshon pa insulto di un ámtenar den funshon
Djaweps 23 di yanüari, alrededor di 1.25 or di mardugá, a detené un hòmber di inisial R.B. di 30 aña di edat na un akomodashon turístiko situá na Bulevar Julio A. Abraham. A detené e hòmber pa insulto di un ámtenar den funshon, buracheria públiko i pa resistí detenshon. E detenshon a tuma lugá despues ku a drenta notifikashon tokante un hòmber ku tabata hospedando na e akomodashon turístiko i tabata kousa molèster. Na yegada di polis, un bewaker a deklará ku algun ratu promé e hòmber a kousa problema kaba i ku el a bebe basta alkohòl. Durante ku e agentenan tabata papia ku e bewaker, e hòmber a bini aserka i a kuminsá grita i filma ku su telefòn.
E hòmber a sigui grita e bewaker i no tabata duna oido na e agente. A surgi un diskushon entre e agente i e hòmber, loke a kondusí na un forsageo kòrtiku despues di kua e hòmber a insultá e agente polisial. Finalmente a detené e hòmber. Durante detenshon e hòmber tabata resistí. Tambe durante su transporte pa warda di polis, e hòmber a sigui insultá e agentenan.
Kuerpo Polisial Hulanda Karibense ta rekordá un i tur ku no ta tolerá niun tipo di violensia ferbal òf físiko kontra agentenan polisial. Agentenan tin tur derecho pa entregá un keho kontra sospechoso(nan) pa kualkier forma di maltrato ku nan eksperensiá tantu ku unifòrm òf sin unifòrm. Un komportashon trankil di un i tur durante kòntròl i na momentu ku konstatá violashon, ta kondusí na un solushon pasífiko ku ta deseabel pa un i tur.
