Number di emergensia: 911 Liña di tep di Polis: 9310

Notisia

Enfoká notisia

Notisia di polis di djabièrnè 26 di aprel te ku djaluna 29 di aprel 2024

Kralendijk - Aksidente ku diferente herido - Den oranan di mardugá riba djaluna 29 di aprel, alrededor di 2.35 or, ‘meldkamer’ sentral a risibí notifikashon tokante un aksidente riba Kaminda di Rincon na altura di Subi Blanku. Un outo di hür a drenta mondi, bòltu i keda riba su banda. Na yegada di e patruya. E kuater (4) okupantenan di e outo tabata pafó di e outo di kua dos tabata heridá na suela i dos tabatin raskunan. Dos ambulans a presentá na e sitio i a transportá dos di e personanan ku tabata den e outo di kua e shofùr pa hòspital pa tratamentu médiko. Despues nan por a bai kas. E dos otro pasaheronan ku a resultá levemente heridá a haña tratamentu médiko na e sitio mes. E pasaheronan a deklará ku nan tabata kore direkshon di Playa i na dado momentu un pikòp a hala i pasa nan. E pikòp a dal den e parti dilanti di e outo pa kual motibu e shofùr di e outo a pèrdè kòntròl i drenta mondi. E pikòp a sigui kore bai. A sera e kaya temporalmente di ámbos banda pa e servisionan konserní por a hasi nan trabou seif. Ta investigando e kaso.

Lesa mas

Vigilansia di kamara durante Dia di Rincon

Kralendijk - Riba djamars, 30 di aprel 2024, Kuerpo Polisial Hulanda Karibense lo hasi uso di vigilansia di kamara durante aktividatnan na okashon di Dia di Rincon. E vigilansia di kamara temporal aki lo ta parti di un proyekto piloto di KPCN na kua lo investigá si instalashon di kamara móbil pa vigilansia tin balor agregá na eventonan kaminda ta spera un públiko grandi.

Lesa mas

Ban selebrá Dia di Rincon na un manera seif i responsabel

Kralendijk - Riba 30 di aprel nos ta selebrá Dia di Rincon. Ta un temporada di fiesta i goso i pa e periodo aki tin basta evento i aktividat planiá. A resultá ku e ora ei sa pèrdè e reglanan vigente i responsabilidat pa ku nos mes i nos próhimo for di bista. Pero esaki no ta notifiká ku e reglanan ta ménos vigente.

Lesa mas

Akshon di limpiesa di ‘beslagruimte’ na warda di polis Playa

Kralendijk - Riba djamars 4 di yüni 2024 Kuerpo Polisial Hulanda Karibense (KPCN) ta organisá un akshon di limpiesa di e área ku ta kontené artíkulonan konfiská (beslagruimte) di warda di polis na Playa. Ta posibel ku en konekshon ku esaki, lo destruí vehíkulonan di dos wil. Di sierto artíkulo- i vehíkulonan e doñonan ta deskonosí.

Lesa mas

Notisia di polis di djárason 24 di aprel te ku djabièrnè 26 di aprel 2024

Kralendijk - Ladronisia di skuter - Riba djabièrnè 26 di aprel a drenta keho di ladronisia di un skuter koló pretu di e marka Kymco, modelo Agility, numerá MF-3794. E skuter tabata stashoná riba un sitio di stashoná banda di un restourant na Kaya J.N.E. Craane. Entre 5.30 or di atardi riba djaweps 25 di aprel i 7.45 or riba djabièrnè 26 di aprel, deskonosínan a bai ku e skuter.

Lesa mas

Notisia di polis di djaluna 22 di aprel te ku djárason 24 di aprel 2024

Kralendijk - Detenshon pa menasa - Riba djamars 23 di aprel, alrededor di 9.20 or di anochi, a detené un hòmber di inisial A.C. riba Kaya Mandolin pa menasa i violashon di Lei di Arma BES. E sospechoso tabata bou di influensia di alkohòl i a kuminsá buska pleitu ku un dama. Durante e pleitu el a menasa e dama i a tira un bòter di serbes den su direkshon. E bòter di serbes no a alkansá e dama i seguidamente e sospechoso a bandoná e sitio. Un patruya a topa e sospechoso den bisendario i a detené. Durante di e detenshon a topa e sospechoso ku un skrufdrai i un kuchú i a konfiská esakinan. Investigashon den e kaso ta kontinuá.

Lesa mas

Mas notisia

Notisia di polis di djabièrnè 19 di aprel te ku djaluna 22 di aprel 2024

Kralendijk - Aksidente entre outo i kabai - Riba djasabra 20 di aprel, alrededor di 9.20 or di anochi, ‘meldkamer’ sentral a risibí notifikashon di un aksidente riba Kaminda Tra'i Montaña. Un outo a alkansá un kabai i su ginete. Ambulans a transportá e ginete pa hòspital pa tratamentu médiko. A detené shofùr di e outo di inisial R.R. di 71 aña, pa manehá bou di influensia di alkohòl. A konfiská e vehíkulo di e sospechoso. Dor di e heridanan ku e kabai a sufri, a pone dòkter di bestia na altura.

Notisia di polis di djárason 17 di aprel te ku djabièrnè 19 di aprel 2024

Kralendijk - Detenshonnan pa manehá bou di influensia - Riba djabièrnè 19 di aprel, alrededor di 2.05 or di mardugá, un patruya a nota un skuter ku dos persona riba dje riba Kaya Internashonal. E shofùr tabatin un hèlm bistí pero e pasahero nò. Pa e motibu aki a duna e shofùr òrdu pa para. Despues di un investigashon por a konstatá ku e shofùr tabata bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta permití. A konsekuensia di esaki a detené e hòmber di inisial K.B.T. di 22 aña di edat pa manehá bou di influensia di alkohòl. A transportá e sospechoso pa warda di polis pa un análisis di rosea i el a haña un prosèsferbal pa manehá bou di influensia di alkohòl. Tambe el a haña un prohibishon di manehá di 2 ora. E pasahero a haña un but pa no tin un hèlm bistí.

Notisia di polis di djaluna 15 di aprel te ku djárason 17 di aprel 2024

Kralendijk - Entradanan hudisial ku detenshon - Riba djamars 16 di aprel, alrededor di 5 or di atardi, a tene entrada hudisial na dos kas situá na Kaya Johanna den Antriol. E entradanan hudisial tabata den kuadro di violashon di Lei di Opio BES. Durante e entrada hudisial un sospechoso a trata na hui for di e sitio, pero a gar’e’. A detené un hòmber di inisial M.G.A. di 48 aña di edat pa violashon di Lei di Opio BES. Durante e entradanan hudisial a konfiská supstansianan probablemente narkótiko i sèn kèsh. Investigashon den e kaso ta kontinuá.

Notisia di polis di djabièrnè 12 di aprel te ku djaluna 15 di aprel 2024

Kralendijk - Detenshon - Den oranan di anochi riba djasabra 13 di aprel, a detené un dama di inisial S.M.S. di 22 aña di edat i un dama di inisial S.R.P. di 41 aña di edat. A detené e promé sospechoso na warda di polis i algun ratu despues a detené e di dos sospechoso na Kaya Taki. E detenshonnan aki ta den kuadro di un investigashon relashoná ku kasonan di ladronisia di último tempu di vehíkulonan, bou di kua E-bikes i skuter. Investigashon den e kasonan ta kontinuá.

Notisia di polis di djárason 10 di aprel te ku djabièrnè 12 di aprel 2024

Kralendijk - Detenshon - Riba djaweps 11 di aprel, alrededor di 1.40 or di mèrdia, a detené un hòmber di inisial C.L.A. di 53 aña di edat na warda di polis. Esaki den kuadro di un kaso kaminda un víktima ku tabata enbolbí den un bringamentu na un bar riba Kaya Korona, a presentá na hòspital ku diferente herida. Esaki a sosodé den oranan di anochi riba djaweps 29 di febrüari. A detené e sospechoso pa maltrato severo, maltrato ku un arma i intento di asesinato. Investigashon den e kaso ta kontinuá.

Notisia di polis di djabièrnè 5 di aprel te ku djárason 10 di aprel 2024

Kralendijk - Detenshonnan pa manehá bou di influensia di alkohòl - Riba djamars 9 di aprel, alrededor di 9.25 or di anochi, a detené un hòmber di inisial B.F.M.B. di 36 aña di edat na altura di Plasa Reina Juliana pa manehá bou di influensia di alkohòl. Esaki despues ku a drenta notifikashon di un outo ku a okashoná un aksidente riba Kaya Korona. E sospechoso a kore riba asera i a dal den un bòrchi di tráfiko. Despues el a kore un pida i stashoná e outo riba asera na Plasa Reina Juliana. Na yegada di e patruya, e shofùr tabata drumí den e vehíkulo. E vehíkulo tabatin daño dilanti na e banda robes. Durante e kòntròl por a konstatá ku e sospechoso tabata mustra vários karakterístika di un persona ku ta bou di influensia di alkohòl. A hasi un tèst di supla ku e sospechoso i a resultá ku el a konsumí mas alkohòl ku ta permití. A detené e sospechoso i a hib’é warda di polis pa un análisis di rosea. A kita su reibeweis.

A interseptá boto ku droga

Kralendijk - Den oranan trempan di mainta riba djaluna 8 di aprel, Wardakosta Karibe Hulandes a interseptá un boto na parti nort-ost di Boneiru.

Notisia di polis di djárason 3 di aprel pa djabièrnè 5 di aprel 2024

Kralendijk - Detenshonnan pa manehá bou di influensia di alkohòl - Riba djabièrnè 5 di aprel, alrededor di 1.30 or di mardugá, un patruya a mira un vehíkulo nan dilanti ta kore zeilu riba kaminda i sin lus. Den Kaya Grandi e shofùr a purba stashoná su vehíkulo, pero no a logra. Pa e motibu aki a aserká e shofùr di e vehíkulo menshoná pa un kòntròl. Durante e kòntròl, e shofùr no por a mustra un reibeweis. Durante e kòmbersashon por a konstatá ku e sospechoso tabata bou di influensia. A hasi un tèst di supla ku e sospechoso i a resultá ku el a konsumí mas alkohòl ku ta permití. A detené e hòmber di inisial C.A.B. di 31 aña di edat pa manehá bou di influensia di alkohòl i a transport’é pa warda di polis pa un análisis di rosea. A konsekuensia di e resultado di esaki, a pone e sospechoso na altura ku e mester entregá su reibeweis. Ademas e sospechoso a hasi uso di su derecho pa hasi un kontra investigashon riba su propio gastu. Ta investigando e kaso.

Notisia di polis di djárason 27 di mart te ku djárason 3 di aprel 2024

Kralendijk - Kandela den kompleho di apartamentu - Riba djamars 2 di aprel, alrededor di 11.45 or di anochi, ‘meldkamer’ sentral a risibí notifikashon tokante kandela den un kompleho di apartamentu na Kaya Inglatera. Na yegada di e patruya, a evakuá habitantenan di e kompleho di aparatamentu ku urgensia. E kandela a kuminsá den un apartamentu na e di dos piso i segun esnan presente, tabatin hende ainda den e apartamentu. Pa e motibu aki, e agentenan a drenta e apartamentu na kandela pa saka e dos personanan. Brantwer a paga e kandela i personal di ambulans a duna tratamentu na e dos personanan ku a saka por último for di e kompleho di apartamentu. Ambulans a transportá un di nan pa hòspital pa tratamentu médiko debí na kemadura. A resultá ku un fèn den e apartamentu a okashoná e kandela.

E tim di krimen sibernétiko di KPCN ta atvertí pa método nobo di ‘hacking’ na Boneiru

Kralendijk - E tim di krimen sibernétiko di Kuerpo Polisial Hulanda Karibense ta atvertí habitantenan di Boneiru pa un método nobo pa ‘hack’ kuenta di medionan sosial. A resultá ku ta aserká hendenan na papiamentu riba plataforma di medionan sosial. Aki ta ofresé ‘yudansa’ pa ku bo kuenta. No ta tur ora ta kuenta nan deskonosí, pero por ta tambe un kuenta di ‘hack’ di un konosí ku ta hasi manera ta bo amigu.

Notisia di polis di djaluna 25 di mart te ku djárason 27 di mart 2024

Kralendijk - Víktima ku herida di bala - Den oranan di anochi riba djamars 26 di mart, polis a risibí un tep ku probablemente tin víktima ku herida di bala a yega hòspital na Kaya Soeur Bartola. Pa esaki a manda un patruya hòspital. Pa motibunan di reglanan di privasidat di hòspital, e patruya no por haña mas informashon tokante e víktimanan ni tampoko tokante e suseso. Ta investigando e kaso. Polis ta pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.

Notisia di polis di djabièrnè 22 di mart te ku djaluna 25 di mart 2024

Kralendijk - Detenshon - Riba djaluna 25 di mart, alrededor di 4 or di mardugá, 'meldkamer' sentral a risibí notifikashon tokante un bringamentu na un bar riba Bulevar Gobernador N. Debrot. Aki a resultá ku un hòmber a baha for di su vehíkulo i a dal un otro hòmber den su kara. Na yegada di e patruya a topa ku un grupo di persona. Miéntras nan tabata na e sitio, diripiente un outo a kore bai. A resultá ku ta outo di e sospechoso. Seguidamente e agentenan a bai su tras i a para e sospechoso riba Kaya Neerlandia. Na momentu ku e agentenan a aserká e shofùr, e tabata mustra diferente karakterístika di un persona bou di influensia di alkohòl. A partisipá klaramente na e sospechoso ku e no por manehá su vehíkulo pa motibu ku e ta bou di influensia di alkohòl. Despues e sospechoso a kuminsá insultá e agentenan. Na e momentu ei a pasa over pa detenshon di e sospechoso. A detené e hòmber di inisial R.F.T. di 42 aña di edat. Ta investigando e kaso. 

Notisia di polis di djárason 20 di mart te ku djabièrnè 22 di mart 2024

Kralendijk - Kachó peligroso - Riba djaweps 21 di mart, alrededor di 4.45 or di atardi, ‘meldkamer’ sentral a risibí notifikashon tokante un kachó ku a ataká un señora riba Kaya Monseigneur Nieuwindt. Na yegada di e patruya e persona ku a mèldu a deklará ku e tabata kana riba karetera públiko i na un dado momentu un kachó a bini den su direkshon. Danki na shofùr di un pikòp ku tabata pasando na e momento ei, ku a bai ku e vehíkulo den direkshon di e kachó, pa evitá ku e kachó ta atak’é. E kachó ta pertenesé na un apartamentu riba e kaya menshoná. E agentenan seguidamente a bai e adrès en buska di e kachó i e doño. Na e adrès, e agentenan a topa ku un kachó blanku ku máron ku tabata kana pafó di kurá. E kachó tabata amabel ku e agentenan. Na dado momentu e kachó a kana bai paden i e agentenan a será e porta di kurá. A papia ku e doño di e kachónan riba e situashon aki i a dun’é un atvertensia por eskrito.

Notisia di polis di djaluna 18 di mart te ku djárason 20 di mart 2024

Kralendijk - Entradanan hudisial ku detenshon - Den oranan trempan di mainta riba djamars 19 di mart, a tene dos entrada hudisial den Rincon. Ta trata di un kas na Kaya Shoshori i un kas na Kaya Taki. E entradanan tabata den kuadro di un investigashon relashoná ku kasonan di ladronisia di último tempu di vehíkulonan, entre otro E-bikes i skuter. Na e kas na Kaya Shoshori a detené un hòmber di inisial P.L.P. di 21 aña di edat i un hòmber di inisial J.S.P. di 19 aña di edat. Na Kaya Taki a detené un hòmber di inisial R.S.D.W. di 19 aña di edat. Durante e entradanan a konfiská diferente artíkulo relevante pa e investigashon. Investigashon den e kaso ta kontinuá.

Notisia di polis di djabièrnè 15 di mart te ku djaluna 18 di mart 2024

Kralendijk - Detenshon pa violashon di Lei di Opio i entrada hudisial - Riba djaluna 18 di mart, alrededor di 2.40 or di atardi, a detené un hòmber di inisial J.A.M. di 33 aña di edat na Plantashi Aruba pa violashon di Lei di Opio BES. E sospechoso a purba pasa ku supstansianan probablemente narkótiko den prizón (JICN) na momentu ku el a bai bishitá un detenido. Pa motibu di kòntròlnan estrikto dirigí riba kontrabanda, a gar’é. A konfiská e sakunan di plèstik ku e supstansianan probablemente narkótiko. En konekshon ku e kaso aki, polis a tene un entrada hudisial na un kas na Kaya Kuarta. Durante e entrada hudisial a enkontrá mas supstansia probablemente narkótiko i mashinnan di pisa. A konfiská esakinan tambe.

Notisia di polis di djárason 13 di mart te ku djabièrnè 15 di mart 2024

Kralendijk - Molèster di kachó - Riba djaweps 14 di mart, ‘meldkamer’ sentral a risibí notifikashon tokante 2 kachó ku a ataká diferente kabritu na Kaminda di Lac. Na yegada di patruya por a nota ku e kachónan a morde por lo ménos 5 kabritu mata. E agentenan a haña deskripshon di e kachónan aki i seguidamente a sali en buska di e kachónan aki. Algu mas lat un yamada a drenta na ‘meldkamer’ sentral, bisando ku e kachónan aki tabata den kurá di un kas. E habitante di e kas a deklará ku e kachónan no ta di dje ni e no sa di ken nan ta. E tin algun luna ta duna e kachónan kuminda, motibu kua nan ta keda bin bèk den su kurá. En konekshon ku e notifikashon aki dòkter di bestia a pasa e kachónan angua.

Notisia di polis di djaluna 11 di mart te ku djárason 13 di mart 2024

Kralendijk - Molèster di kachó - Riba djárason 13 di mart, alrededor di 7.05 or di mainta, ‘meldkamer’ sentral a risibí notifikashon tokante dos kachó ku a ataká un otro kachó (un chihuahua) na Kaya Buni. Na yegada di e patruya e persona ku a mèldu a deklará ku esaki no ta e promé biaha ku e kachónan di su bisiña ta ataká su kachonan i ku den pasado nan a morde i mata un kachó di dje. A konseh’é pa hiba su kacho un dòkter di bestia.

Notisia di polis di djabièrnè 8 di mart te ku 11 di mart 2024

Kralendijk - Pikòp a bòltu - Riba djadumingu 10 di mart, alrededor di 5.25 or di atardi, ‘meldkamer’ sentral a risibí notifikashon tokante un aksidente riba Kaminda Tra’i Montaña. Un pikòp a bòltu. Na yegada di e patruya e shofùr tabata sintá banda di e vehíkulo. E shofùr a deklará ku e tabata bini for di Rincon, direkshon Playa i a pèrdè kòntròl den un bògt, pa kual motibu e vehíkulo a bòltu. Ambulans a transportá e shofùr pa hòspital pa tratamentu médiko.

Notisia di polis di djárason 6 di mart te ku djabièrnè 8 di mart 2024

Kralendijk - But pa manehá di forma imprudente - Riba djabièrnè 8 di mart, alrededor di 3.50 or di mardugá, un patruya a spòt un vehíkulo ku tabata kore ku velosidat haltu den direkshon nort riba Kaya Korona. Esaki tabata motibu pa e patruya a bai tras di e vehíkulo. A sende e lusnan óptiko (zwaailicht) i señal di zonido pa para e shofùr. E shofùr tabata mustra un komportashon di manehá imprudente i tabata pasa diferente vehíkulo riba Kaya Korona. Debí na e velosidat haltu ku e shofùr tabata manehá, e agentenan a disidí di stòp ku e persekushon riba Kaminda Tras di Montaña. Algun ratu despues a topa ku e vehíkulo i e shofùr na un adrès den Rincon. E shofùr a haña un but pa manehá di forma imprudente.

Notisia di polis di djaluna 4 di mart te ku djárason 6 di mart 2024

Kralendijk - Detenshonnan pa manehá bou di influensia - Riba djárason 6 di mart, alrededor di 2.15 or di mardugá, a spòt un skuter ku tres persona riba dje riba Kaya L.D. Gerharts. Niun di e tres personanan tabatin un hèlm bistí tampoko. Pa e motibu aki a duna e shofùr òrdu pa para. Despues di un investigashon por a konstatá ku e shofùr tabata bou di influensia di alkohòl i a hasi un tèst di supla kuné. A konsekuensia di e resultado di esaki, a detené un hòmber di inisial P.v.d.H. di 23 aña di edat pa manehá bou di influensia di alkohòl. Ademas, e shofùr no por a mustra un reibeweis tampoko i a dun’é un but pa tantu esaki i pa manehá sin un hèlm bistí. E sospechoso a haña un prohibishon di manehá di 4 ora. E otro dos pasaheronan tambe a haña un but pa manehá sin un hèlm bistí.

Bo ke lesa mas notisia òf bo no por a haña loke bo tabata buska? E ora ei bai na e página di búskeda pa mas notisia.

Bai na e página di búskeda pa mas notisia